Eph 5 | KMG | STEP | Ŋoŋe joroc naru motecfâcne juŋgopieŋzi Anutu sâckehuc junšepieŋ.

Ephesians 5

Sâqocne geŋkecnehuc juzo

1 Ŋoŋe joroc naru motecfâcne juŋgopieŋzi Anutu sâckehuc junšepieŋ. 2 Erâ maŋjauŋhec junšepieŋ. Kristo e iŋuc jaha maŋjauŋ enârehuc nâŋâcnere erâ sahac-ticne qaisockerâ Anutu taha bâzi biaŋ ecnewec. 3 Boe sau, sasec mamakâc, buchâro, irec saŋuc wâc mitiŋic ŋoŋere ŋondeŋko mi fuazejec. 4 Dâŋ miminehec, mutucdâŋ, dâŋ simbiŋne, i epie sâqoreocmu. Daŋge mumuteŋ ine epie sâckeocmu. 5 Ŋoŋe šiŋuc mana sanaŋkenšepieŋ: Boe sau ŋic â sasec mamakâchec â buchâro, nemu qaŋgec ŋic hâcne, jaŋe Kristo â Anutu uucmaŋ-ticnao ŋeŋe basaniŋmu.

Soŋsoŋko wiac miminehec mi ezo

6 Eatuc-ŋopahuc siocdâŋ ŋazapie manapie fârine mi ezejec. Sâqocne iŋucnere hâcne Anuturaonec okacne qaqatara ŋic jaŋerao fuaocmu. 7 Irec ŋoŋe mi bafic-jopanšepieŋ. 8 Ŋoŋe mârâc jaha dapâchec jujumbieŋ, ši ine Wofuŋtao fisirâ tatamachec embiŋ juŋgopieŋ. Irec tatamacte ɋâricfâc erâ irec hawari junšepieŋ. 9 Tatamacte fârine fuaekac i maŋbiaŋhec juju â tiŋne ju ju â jâmbomac dâŋ mumu. 10 Wiac ezo murâ ine Wofuŋzi maname biaŋkeocmu me mâcne, i qanaŋ mana wosâerâ enšepieŋ. 11 Gâcnezi dapâcte wiac jawane epie mi qâsuec-jopanšepieŋ, aricne. Ŋoŋe irec tapa qararuŋkehuc qatara-jarenšepieŋ. 12 Wiac soŋsoŋko eeŋgopieŋ i mu bâuac epene miminehec jaha eocmu. 13 Wiac iŋucne tapane qararuŋkepene tatamaczi âeckeme fuaocmu. Eme tâtâc fuakac wiac izi wâc tatamac bâfuaocmu. 14 Irec hâcne šiŋuc mukicne:

“Guŋ foekiczi faharec, â hâmockonec ɋârec,
eme Kristozi batamaecguocmu.”

Maŋmutuc erâ dameŋ mi sipirickezo

15 Ŋoŋe juju bapa-ŋeŋicte ruc bahuc junšepieŋ. Erâ mutuc matacne mâcne, maŋ mamanasuhec junšepieŋ. 16 Dameŋ šira sâqocnezi haŋ bawec fokacte dameŋ gâcne mi behehuc gie šoɋachec banšepieŋ. 17 Maŋ tâmiric tinac mi junšepieŋ, Wofuŋzi gie muŋareekac i hone šâŋitac enšepieŋ. 18 Waiŋ opâ wiacte âmbâŋ mi enšepieŋ, izi maŋ sisipiric gie. Mârore ine âmbâŋ enšepieŋ. 19 Mârozi esoc-ŋopaocmu sâc gae mânec hehuc maŋ nareŋ gareŋ enšepieŋ. Á maŋŋeŋicko Wofuŋ gaezi â musizi mu šeri ecnenšepieŋ. 20 Erâ Wofuŋ-nâŋec Jesu Kristore erâ dameŋ sâc Anutu Mamac wiac fuŋne fuŋnere daŋge mumuteŋ ecnenšepieŋ.

Ŋonâŋ jaŋere dâŋ

(Koì 3: 18 4: 1)

21 Ŋoŋe Kristo araŋ bacnehuc micrereŋ eec efârenšepieŋ. 22 Ŋonâŋ ŋoŋe Wofuŋte rereŋfâc juŋgopieŋ iŋuc jaha ŋowefâc-ŋeŋic jaŋere junšepieŋ. 23 Ŋowezi ŋonâŋte qizec ekac hâcne, iŋuc jaha Kristozi kikefuŋte qizec ekac, ehuc me sahac-ticnere bâbâpiaŋ wâc ekac. 24 Eme kikefuŋzi Kristore mic reŋkeekac, iŋuc jaha ŋonâŋ jaŋe ŋowefâc-jeŋic jaŋere mic dameŋ sâc reŋkenšepieŋ.

Ŋowe jaŋere dâŋ

25 Ŋowe ŋoŋe ŋonâŋfâc-ŋeŋic maŋjauŋ ejarenšepieŋ. Kristo e iŋuc jaha kikefuŋ-ticne maŋjauŋ ecnehuc ere due bawec. 26 Erâ kikiruhucne â sâfânehec â wâc wiac gâcnehec juzacte mitidâŋzi opâ umbiŋkeha šurehuc jambuŋkerâ 27 ericke bâpiaŋ ecnerâ e jahacne biŋe furu â bahacmâc juocte mucnewec. 28 Eme ŋowe jaŋe jaŋacne sahac jauŋ bacneeŋgopieŋ, sâc ijaha ŋonâŋfâc-jeŋic bajarenšepieŋ. Moc e ŋonâŋ-ticne maŋjauŋ ecnehuc e jahacne sahac mâmâc ecneocmu. 29 Ŋic moczi moc sahac-ticne râsi mi eecne, gume jauŋ ecnehuc jaha juekac, Kristozi kikefuŋ ecnehuc juekac iŋuc” 30 nâŋâc me sahac-ticnere tofafâc juŋgopeneŋ hâcne. 31 “Irec hâcne ŋic moczi neŋgoc mamac jahec-ticne behec-jofarâ ŋonâŋ-ticnerao qohotame jahe maŋ sahac mocjaha erâ junicmu.” 32 I dâŋ soŋne, qame hukicne. Ine Kristo â Kikefuŋ jahere muhuc mukopac. 33 Ŋoŋe ine ŋic sasawa sahac-ŋeŋic jauŋ baeŋgopieŋ sâc ijaha ŋonâŋfâc-ŋeŋic jauŋ bacjopanšepieŋ. Á ŋokac ine ŋowefâc-ŋeŋic araŋ bajarenšepieŋ.